Central AsianResearch Index

Tug‘ma lab va tanglay kemtikligi fonida kechuvchi shifoxonadan tashqari pnevmoniyada mikrobiota ko‘rsatkichlarining xususiyati

Kirish. Tug‘ma yuqori lab va tanglay kemtikligi (TLTK) bo‘lgan bolalarda shifoxonadan tashqari pnevmoniya (SHTP) rivojlanishi zamonaviy pediatriya va yuz-jag‘ jarrohligining dolzarb muammolaridan biridir. TLTK bo‘lgan bolalar mikrobiota holatiga ko‘ra individuallashtirilgan yondashuvlarni talab qiladi. Shunday qilib, TLTK bo‘lgan chaqaloqlarda hayotining birinchi kunlaridanoq oshqozon-ichak traktining morfologik va funksional buzilishlari kuzatiladi. Material va usullar. Tadqiqot doirasida asosiy guruhga o‘tkir pnevmoniya bilan og‘rigan, TLTK bo‘lgan 40 nafar bola, taqqoslash guruhiga o‘tkir pnevmoniya bilan og‘rigan, TLTK bo‘lmagan 44 nafar bola kiritildi. Najas namunalari PZR usuli orqali laboratoriya tekshiruvidan o‘tkazildi. Olingan ma’lumotlar Fisher-Styudent bo‘yicha tavsifiy va variatsion statistika usullari yordamida statistik tahlil qilindi. O‘rtacha qiymatlardagi farqlarning statistik ahamiyati p<0,05 ahamiyatlilik darajasida belgilandi. Natijalar. Kompleks mikrobiologik tadqiqot natijalari TLTK fonidagi SHTP bilan kasallangan bolalarda og‘iz bo‘shlig‘i va ichak mikrobiotasining sezilarli buzilishlari mavjudligini ko‘rsatdi. Og‘iz bo‘shlig‘i mikrobiotasida shartli patogen va saprofitlar, jumladan S. salivarius, S. mitis, C. albicans, S.aureus hamda gemolitik E.coli ustunlik qildi. Asosiy guruhda normoflora vakillari bo‘lgan S. salivarius va S. mitis (p<0,05) miqdorining ishonchli pasayishi kuzatildi. Aksincha, C.albicans va S. Aureus ning aniqlanish chastotasi va miqdori asosiy guruhda sezilarli yuqori bo‘ldi (p<0,05-0,01). Ichak mikrobiotasi tahlilida ham asosiy guruhda disbiotik o‘zgarishlar aniqlandi. Bifidobakteriyalar va laktobakteriyalar miqdori TLTKsiz bolalarga nisbatan ishonchli past bo‘ldi (p<0,001). Shu bilan birga, enterokokklar, laktozanegativ E. coli, S. aureus va achitqisimon zamburug‘lar miqdori asosiy guruhda yuqori ekanligi qayd etildi (p<0,05). Xulosa. Olingan natijalar TLTK fonidagi bolalarda normoflora vakillari kamayishi, shartli patogen mikroorganizmlar faollashuvi va zamburug‘lar kolonizatsiyasining ortishi bilan kechuvchi og‘ir disbiotik o‘zgarishlar shakllanishini ko‘rsatdi.

Сведения

Опубликовано
2026 · Т. 5, № 5, С. 1460-1465
Язык
Узбекский
ISSN
2181-2926
Издатель
Andijan State Medical Institute
Аффилиации
Andijon davlat tibbiyot instituti, Andijon, Oʻzbekiston.