Сарытоғай І – Іленің сол жағалауындағы ерте темір дәуірінің ескерткіші:: алдын ала зерттеулер нәтижесі
Мақалада авторлар Сарытоғай І қорымының шығыс тобындағы екі – № 11 және № 15 жерлеу-ғұрыптық кешенінде жүргізілген қазба жұмыстарына сипаттама береді. Нысандарды зерттеу оңтүстік-шығыс Жетісу археологиялық аймағындағы ескерткіштер құрамына кіретін жерлеу кешендерінің мәдени ұқсастығын анықтау және материалдарға салыстырмалы талдау жасау қажеттілігіне байланысты туындады. Археологиялық қазба жұмыстары барысында қару-жарақтар мен тұрмыстық заттар – қола және сүйек (мүйіз) жебелер, қола пышақ пен сүйектен жасалған қайыс бау үзбесі сынды ерекше материалдар алынды. Жерлеу-ғұрыптық кешендерін тұрғызудағы архитектуралық әдістерінің құрылымдық ерекшеліктері бойынша да анағұрлым қызықты деректер анықталды. Алынған материалдарға талдау жасай отырып, ескерткішті сақ-үйсін мәдениетінің кейінгі кезеңімен, яғни б.д.д. IV–I ғғ. деп мерзімдейміз. Осылайша, Сарытоғай аңғарында тарихи-мәдени мұра ескерткіштерін зерттеу жұмыстарының жалғасуы қисынды, себебі оңтүстік-шығыс Жетісу аймағы Қазақстанның ежелгі тұрғындарының материалдық және рухани мәдениетіне бай ерекше дереккөз.
Сведения
- Журнал
- Archeology of Kazakhstan
- Опубликовано
- 2024 · № 4 (26), С. 207-235
- Язык
- Казахский
- ISSN
- 2663-6794 · 2789-4525
- Издатель
- INSTITUTE Archeology named A. Kh. Margulan