БІРТЕКТІ ПОЛИЭЛЕКТРОЛИТТЕРДЕН ҚҰРЫЛҒАН ИНТЕРПОЛИМЕРЛІК ЖҮЙЕЛЕРДІҢ АУЫР МЕТАЛЛ ИОНДАРЫН СОРБЦИЯЛАУ ЕРЕКШЕЛІКТЕРІ
Мақалада КУ-2-8:Lewatit CNP LF интерполимерлік жүйесінің мыс және қорғасын иондарына қатысты сорбциялық қасиеттері зерттелді. Жұмыстың мақсаты — күшті және әлсіз катионалмастырғыш шайырлар негізінде құрылған интерполимерлік жүйелер арқылы сулы ерітінділерден ауыр металл иондарын (Pb²⁺, Cu²⁺) сорбциялау процесін зерттеу және жүйе компоненттерінің мольдік қатынасының сорбция тиімділігіне әсерін бағалау. Зерттеуде индуктивті байланысқан плазмалы оптикалық-эмиссиялық спектрометрия және Фурьетүрлендірілген инфрақызыл спектроскопия әдістері қолданылды. Нәтижелер екі металл үшін де жанасу уақыты ұлғайған сайын сорбция дәрежесінің артқанын көрсетті. КУ-2-8:Lewatit CNP LF интерполимерлік жүйесінің 3:3 мольдік қатынасында сорбцияның ең жоғары мәндері Cu²⁺ үшін 46,26%, ал Pb²⁺ үшін 53,6% болды. Эксперименттік деректер Ленгмюр және Фрейндлих изотермалық модельдерімен сипатталды. Сорбция процесі Ленгмюр моделіне қарағанда Фрейндлих моделімен жақсы сипатталатыны анықталды, бұл интерполимерлік жүйе бетінің белсенді орталықтарының энергетикалық біртекті еместігін және металл катиондары сорбциясының көпқабатты сипатын көрсетеді. Қорғасын иондары үшін Фрейндлих константасы (K_F = 4,38) мыс иондарына қарағанда (K_F = 3,66) жоғары болды, бұл интерполимерлік жүйенің Pb²⁺ иондарына қатысты сорбциялық қабілетінің жоғары екенін көрсетеді. Жеке катионалмастырғыштарда 6:0 және 0:6 қатынастарында десорбция тиімділігі 98–99,7%-ға жетті, ал 3:3 интерполимерлік жүйеде металдардың жиынтық десорбция дәрежесі шамамен 96%-ды құрады. Алынған нәтижелер КУ-2-8:Lewatit CNP LF интерполимерлік жүйесін сулы ерітінділерден ауыр металл иондарын бөліп алу үшін перспективалы материал ретінде қолдануға болатынын көрсетті.
Сведения
- Опубликовано
- 2026 · № 3
- Язык
- Казахский
- ISSN
- 2224-5286 · 2518-1491
- Издатель
- Central Asian Academic Research Center LLP